ਮਾਤਾ ਗੁਜਰੀ ਕਾਲਜ ਵਿਖੇ ਇਨੋਵੇਸ਼ਨ ਅਤੇ ਇੰਟਲੈਕਚੁਅਲ ਪ੍ਰਾਪਰਟੀ ਰਾਈਟਸ ਤੇ ਆਨਲਾਈਨ ਵੈਬੀਨਾਰ ਆਯੋਜਿਤ
ਫ਼ਤਹਿਗੜ੍ਹ ਸਾਹਿਬ
ਮਾਤਾ ਗੁਜਰੀ ਕਾਲਜ ਵਿਖੇ ਇਨੋਵੇਸ਼ਨ ਅਤੇ ਇੰਟਲੈਕਚੁਅਲ ਪ੍ਰਾਪਰਟੀ ਰਾਈਟਸ ਵਿਸ਼ੇ ਤੇ ਇੱਕ ਵੈਬੀਨਾਰ ਕਰਵਾਇਆ ਗਿਆ ।ਡਾ. ਐੱਸ ਐੱਨ ਪਾਂਡਾ, ਡਾਇਰੈਕਟਰ ਰਿਸਰਚ , ਚਿਤਕਾਰਾ ਯੂਨੀਵਰਸਿਟੀ ਨੇ ਇਸ ਵੈਬੀਨਾਰ ਦੌਰਾਨ ਆਪਣੇ ਵਿਚਾਰ ਪੇਸ਼ ਕੀਤੇ ।
ਕਾਲਜ ਦੇ ਡਾਇਰੈਕਟਰ ਪ੍ਰਿੰਸੀਪਲ ਡਾ ਕਸ਼ਮੀਰ ਸਿੰਘ ਨੇ ਮੁੱਖ ਬੁਲਾਰੇ ਨੂੰ ਜੀ ਆਇਆਂ ਕਹਿੰਦਿਆਂ ਅਧਿਆਪਕਾਂ ਨੂੰ ਆਪਣੇ ਖੋਜ ਕਾਰਜ ਉੱਚ ਦਰਜੇ ਦੇ ਕਰਨ ਲਈ ਪ੍ਰੇਰਿਤ ਕਰਦਿਆਂ ਕਿਹਾ ਕਿ ਉਹ ਆਪਣੀ ਖੋਜ ਅਤੇ ਨਵੀਨਤਮ ਤਕਨੀਕਾਂ ਵਿਕਸਤ ਕਰਕੇ ਰਜਿਸਟਰ ਕਰਵਾਉਣ ਦੀ ਪ੍ਰਕਿਰਿਆ ਵੀ ਅਪਣਾਉਣ ।
ਡਾ. ਕਸ਼ਮੀਰ ਸਿੰਘ ਨੇ ਕਿਹਾ ਕਿ ਇਨੋਵੇਸ਼ਨ ਅਤੇ ਇੰਟਲੈਕਚੁਅਲ ਪ੍ਰਾਪਰਟੀ ਰਾਈਟਸ ਕਾਨੂੰਨੀ ਅਧਿਕਾਰ ਹਨ ਜੋ ਉਦਯੋਗਿਕ, ਵਿਗਿਆਨਕ, ਸਾਹਿਤਕ ਜਾਂ ਕਲਾਤਮਕ ਖੇਤਰਾਂ ਵਿੱਚ ਇਕ ਵਿਅਕਤੀ ਨੂੰ ਬੌਧਿਕ ਗਤੀਵਿਧੀ ਦੇ ਨਤੀਜੇ ਵਜੋਂ ਪ੍ਰਾਪਤ ਹੁੰਦੇ ਹਨ। ਇਹ ਉਸ ਵਿਅਕਤੀ ਦੇ ਗਿਆਨ ਨੂੰ ਦਰਸਾਉਂਦਾ ਹੈ ਜੋ ਪੇਟੈਂਟ ਜਾਂ ਕਾਪੀਰਾਈਟ ਦੇ ਰੂਪ ਵਿੱਚ ਹੋ ਸਕਦਾ ਹੈ ਭਾਵ ਉਹ ਸਭ ਕੁਝ ਜੋ ਵਿਸ਼ਵ ਵਿੱਚ ਉਪਲਬਧ ਨਹੀਂ ਹੈ ਅਤੇ ਜਿਸ ਨਾਲ ਸਮਾਜ ਨੂੰ ਲਾਭ ਹੋ ਸਕਦਾ ਹੈ। ਡਾ. ਕਸ਼ਮੀਰ ਸਿੰਘ ਨੇ ਕੰਪਿਊਟਰ ਸਾਇੰਸ ਵਿਭਾਗ ਨੂੰ ਵੈਬਿਨਾਰ ਲਗਾਉਣ ਲਈ ਵਧਾਈ ਵੀ ਦਿੱਤੀ।
ਪ੍ਰੋ. ਮੁਕੇਸ਼ ਕੁਮਾਰ, ਮੁੱਖੀ, ਪੀ. ਜੀ. ਕੋਰਸੇਸ, ਕੰਪਿਊਟਰ ਸਾਇੰਸ ਵਿਭਾਗ ਨੇ ਵੈਬਿਨਾਰ ਦੇ ਵਿਸ਼ੇ ਨਾਲ ਜਾਣ ਪਛਾਣ ਕਰਵਾਈ ਅਤੇ ਇਸ ਵੈਬੀਨਾਰ ਕਰਵਾਉਣ ਦੇ ਉਦੇਸ਼ ਬਾਰੇ ਚਾਨਣਾ ਪਾਇਆ । ਇਸ ਮੌਕੇ ਡਾ. ਹਰਜੀਤ ਸਿੰਘ , ਮੁਖੀ, ਯੂ. ਜੀ. ਕੋਰਸਿਸ ਕੰਪਿਊਟਰ ਸਾਇੰਸ ਵਿਭਾਗ ਨੇ ਡਾ. ਐੱਸ ਐੱਨ. ਪਾਂਡਾ ਦੀ ਜਾਣ ਪਛਾਣ ਕਰਵਾਉਂਦੇ ਹੋਏ ਡਾ. ਪਾਂਡਾ ਦੇ ਉੱਤਮ ਖੋਜ ਕਾਰਜਾਂ ਬਾਰੇ ਚਾਨਣਾ ਪਾਇਆ ।
ਡਾ. ਪਾਂਡਾ ਨੇ ਸੈਸ਼ਨ ਦੀ ਸ਼ੁਰੂਆਤ “ਨਵੀਨਤਾ” ਦੀ ਪਰਿਭਾਸ਼ਾ ਨਾਲ ਕੀਤੀ। ਉਸਨੇ ਕਿਹਾ ਕਿ “ਇੱਕ ਵਿਚਾਰ ਅਵਿਸ਼ਕਾਰ ਦਾ ਬੀਜ ਹੈ” ।ਉਨ੍ਹਾਂ ਨੇ ਨਵੀਨਤਾ ਦੇ ਸੰਕਲਪ ਨੂੰ ਅਸਲ ਜੀਵਨ ਦੀਆਂ ਕਈ ਉਦਾਹਰਣਾਂ ਨਾਲ ਦਰਸਾਇਆ। ਉਨ੍ਹਾਂ ਨੇ ਕਿਹਾ ਕਿ ਇੱਕ ਵਿਚਾਰ ਅਤੇ ਆਲੋਚਨਾਤਮਕ ਸੋਚ ਇੱਕ ਨਵੇਂ ਅਵਿਸ਼ਕਾਰ ਵੱਲ ਲੈ ਕੇ ਜਾਂਦੀ ਹੈ। ਸਾਨੂੰ ਹਮੇਸ਼ਾਂ ਤਕਨੀਕੀ ਤੌਰ ਤੇ ਕਿਸੇ ਵੀ ਸਮੱਸਿਆ ਦਾ ਹੱਲ ਲੱਭਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ । ਉਸ ਵਿਚਾਰ ਦਾ ਕੋਈ ਫਾਇਦਾ ਨਹੀਂ ਜੋ ਸਾਨੂੰ ਕਿਸੇ ਨਵੀਨਤਾ ਵੱਲ ਲੈ ਕੇ ਨਹੀਂ ਜਾਂਦਾ ਅਤੇ ਆਖਰਕਾਰ ਉਸ ਵਿਚਾਰ ਦਾ ਅੰਤ ਹੋ ਜਾਂਦਾ ਹੈ । ਉਨ੍ਹਾਂ ਨੇ ਚਾਰ ਕਿਸਮਾਂ ਦੀਆਂ ਨਵੀਨਤਾਵਾਂ ਜਿਨ੍ਹਾਂ ਵਿੱਚ ਟੈਕਨੋਲੋਜੀਕਲ, ਉਤਪਾਦ, ਪ੍ਰਕਿਰਿਆ ਅਤੇ ਪ੍ਰਬੰਧਨ ਸ਼ਾਮਿਲ ਹਨ ਬਾਰੇ ਦੱਸਿਆ । ਡਾ. ਪਾਂਡਾ ਨੇ ਕਿਹਾ ਕਿ ਹਰ ਨਵੀਨਤਾ ਦਾ ਇੱਕ ਨਿਸ਼ਚਤ ਜੀਵਨ ਕਾਲ ਹੁੰਦਾ ਹੈ ਜਿਸਦੇ ਬਾਅਦ ਇਹ ਖਤਮ ਹੁੰਦਾ ਹੈ ਅਤੇ ਇਸ ਨੂੰ “ਤਕਨੀਕੀ ਵਿਘਨ” ਵਜੋਂ ਜਾਣਿਆ ਜਾਂਦਾ ਹੈ।
ਉਨ੍ਹਾਂ ਨੇ ਅਧਿਆਪਕਾਂ ਨੂੰ ਨਵੇਂ ਵਿਚਾਰ ਸਿੱਖਣ ਅਤੇ ਲਾਗੂ ਕਰਨ ਲਈ ਪ੍ਰੇਰਿਤ ਕੀਤਾ। ਅਧਿਆਪਕ ਵਿਦਿਆਰਥੀਆਂ ਨੂੰ ਨਵੀਆਂ ਖੋਜਾਂ ਵੱਲ ਪ੍ਰੇਰਿਤ ਕਰ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਅਸੀਂ ਬੁੱਧੀਜੀਵੀ ਜਾਇਦਾਦ ਦੇ ਅਧਿਕਾਰ ਦੀ ਵਰਤੋਂ ਕਰਦਿਆਂ ਆਪਣੀ ਨਵੀਨਤਾ ਜਾਂ ਆਪਣੀ ਸਿਰਜਣਾਤਮਕਤਾ ਦੀ ਰੱਖਿਆ ਕਰ ਸਕਦੇ ਹਾਂ। ਆਈ.ਪੀ.ਆਰ. ਦੇ ਦੌਰਾਨ ਅਸੀਂ ਖੋਜ ਦੀ ਨਕਲ ਹੋਣ ਤੋਂ ਬਚਾ ਸਕਦੇ ਹਾਂ ਅਤੇ ਅਸੀਂ ਪੇਟੈਂਟ ਸਪੈਸੀਫਿਕੇਸ਼ਨ ਦੀ ਵਰਤੋਂ ਕਰ ਸਕਦੇ ਹਾਂ। ਡਾ. ਪਾਂਡਾ ਨੇ ਕਾਪੀਰਾਈਟ, ਪੇਟੈਂਟ, ਟ੍ਰੇਡਮਾਰਕ, ਉਦਯੋਗ ਡਿਜ਼ਾਈਨ ਅਤੇ ਭੂਗੋਲਿਕ ਸੂਚਕ ਬੌਧਿਕ ਜਾਇਦਾਦ ਬਾਰੇ ਵਿਸਥਾਰ ਨਾਲ ਵਿਚਾਰ ਵਟਾਂਦਰੇ ਕੀਤੇ.। ਕੰਪਿਊਟਰ ਵਿਭਾਗ ਦੇ ਡੀਨ ਪ੍ਰੋ. ਰਸ਼ਮੀ ਅਰੋੜਾ ਨੇ ਧੰਨਵਾਦ ਦਾ ਮਤਾ ਪੇਸ਼ ਕੀਤਾ ।
ਡੀਨ ਅਕਾਦਮਿਕ ਡਾ.ਬਿਕਰਮਜੀਤ ਸਿੰਘ ਸੰਧੂ , ਵਾਈਸ ਪ੍ਰਿੰਸੀਪਲ ਡਾ ਰਾਜਿੰਦਰ ਕੌਰ, ਡਾ ਹਰਵੀਨ ਕੌਰ ਤੋਂ ਇਲਾਵਾ ਵੈਬੀਨਾਰ ਵਿੱਚ ਕਾਲਜ ਦੇ ਤਕਰੀਬਨ 90 ਅਧਿਆਪਕਾਂ ਨੇ ਹਿੱਸਾ ਲਿਆ ।
(25 ਮਈ )
